Бяцхан ханхүү

Tiny is big = Бяцхан гэдэг бол том гэсэн үг.
Бяцхан ханхүүгийн өчүүхэн жижиг гариг нь байшингаас үл ялиг л том. Гурван галт уултай, нэг цэцэгтэй.






Баобаб гэгдэх хорт муу модод хогийн ургамал шиг л ургаж эхэлсэн. Ямар ч зүйл ургаж, томорхоосоо өмнө жижгээс эхэлдэг. Цагийн юмыг цагт нь буюу тэдгээр моддыг томорхоос нь өмнө устгах хэрэгтэй.









Нэг өдөр, хаанаас ч юм туугдан ирсэн үрнээс  нэгэн маш онцгой цэцэг гараад ирчихсэн байсан тул бяцхан ханхүү бусдаасаа нэн өөр тэрхүү нахиаг өчүүхэн ч холдолгүй ширтэж байв. Энэ бяцхан нахиа удалгүй үзэсгэлэнт сарнай болсон юм. Сарнай хичнээн дургүй байсан ч бяцхан ханхүү нэгэн өдөр гаригаа орхин аялсаар дэлхий дээр хүрэлцэн ирдэг. Аялалын замдаа хэд хэдэн жижиг гаригаар дайрдаг. Магтуулах дуртай биеэ тоосон хүний гариг, бүхнийг захирахыг хүсэгч хааны гариг, утга учиргүй согтуурагч архичины гариг, оддыг тоолон "өмчилдөг" бизнесмэний гариг, минут бүр "тушаал"-ын дагуу гэрэл асааж унтраах гэрэл асаагчийн гариг, зөвхөн ширээний ард сууж бичиг, цаастай зууралдах газарзүйчийн гэсэн зургаан гаригийн дараа газарзүйчийн зөвлөснөөр долоо дахь гариг дэлхий дээр ирдэг.

Дэлхий дээр ирээд хамгийн эхлээд могойтой тааралддаг. Дараа нь дүүрэн сарнайтай цэцэрлэгт ирээд өөрийнх нь сарнай ертөнцөд ганц байдаг онцгой ховор цэцэг биш эдгээр сарнайны л адил ердийн л нэг цэцэг юм, тийм болохоор өөрөө ч бас онцгой ханхүү биш юм гэж бодоод уйлж эхэлтэл үнэг гарч ирдэг.


Үнэгний сургааль: Хэрвээ чи намайг сургах юм бол бид бие биедээ хэрэгтэй болно. Хэрвээ чи 4 цагт над дээр ирж байх юм бол чи миний хувьд хорвоо ертөнцөд ганцхан хувь байх болно. Би ч мөн адил, чиний хувьд. 3 цаг болмогц би баярлаж эхэлнэ. Харин чи хэзээ ч хамаагүй ирэх юм бол би чамайг ирнэ гэж хэзээ баярлаж эхлэхээ мэдэхгүй. Бид бүгдэд тогтсон зан хэрэгтэй. Чи зүрх сэтгэлээрээ л юмсыг тодорхой харж чадна. Нүдэнд үл үзэгдэгч юмс л чухал байдаг юм. Өөрийнхөө сарнайнд зарцуулсан цаг хугацаа чинь чиний сарнайг тийм чухал болгож байгаа юм. Чи цаг хугацаа зарцуулан өөрийн болгосон зүйлдээ үүрд хариуцлага хүлээх болдог. Чи өөрийн сарнайныхаа өмнө хариуцлага хүлээсэн.

Бяцхан ханхүүгийн ухаарал:  'Танай энэ дэлхийд хүмүүс цэцэрлэгтээ 5000 сарнай ургуулдаг ч өөрсдийн хайсан зүйлээ олж чаддаггүй. Гэтэл тэдний хайж буй зүйл нэгхэн сарнай, балгахан усанд ч байж магад. Нүд сохор гэдэг, зүрх сэтгэлээрээ харах ёстой юм. ' Номын төгсгөлд бяцхан ханхүү өөрийнхөө сарнайг харж, хамгаалахаар гариг уруугаа буцан оддог.


Номын товчхондоо иймэрхүү бөгөөд ухаарал авахаар хөөрхөн ном шүү. Та уншаад үзээрэй.

Зохиогч Antoine de Saint-Exupéry

Монгол хэлэнд орчуулагдсан эсэхийг мэдэхгүй ч Англи хэл дээр эндээс уншиж болно.

Tweet